Lord Jon Olderdays boshchiligidagi delegatsiya TMKda

O‘zbekiston texnologik metallar kombinatida Buyuk Britaniya Bosh vazirining Markaziy Osiyo va Ozarbayjon bo‘yicha maxsus savdo vakili Lord Jon Olderdays hamda Buyuk Britaniyaning O‘zbekistondagi elchisi janob Timoti Smart boshchiligidagi delegatsiya bilan yuqori darajadagi uchrashuv bo‘lib o‘tdi.

Uchrashuvda hamkorlikning muhim yo‘nalishlaridan biri sifatida TMK loyihalarining dastlabki muhandislik tadqiqotlari, texnik-iqtisodiy asoslari, shuningdek, ekologik va ijtimoiy ta’sirni baholash bosqichlarini moliyalashtirish imkoniyatlari muhokama qilindi.

Shuningdek, quyidagi tashabbuslar ilgari surildi:

🔹 Buyuk Britaniya aviatsiya sanoati ehtiyojlari uchun muhim metallarni uzoq muddatli yetkazib berish dasturini yo‘lga qo‘yish;

🔹 Buyuk Britaniyaning yetakchi ilmiy-tadqiqot muassasalari bilan hamkorlikda “Kelajak metallurglari” qo‘shma ta’lim dasturini yo‘lga qo‘yish hamda har yili kadrlar salohiyatini oshirish;

🔹 sun’iy intellekt va raqamli kuzatuv tizimlari asosida resurs harakati va ekologik monitoring, resurs harakatini kuzatish va xalqaro ekologik standartlarga muvofiqlikni ta’minlash bo‘yicha pilot tashabbusni amalga oshirish.

Shuningdek, har yili Toshkent va  London shaharlarida “Buyuk Britaniya – O‘zbekiston kritik metallar forumi”ni o‘tkazish hamda “Kritik metallar investitsiya muloqoti” platformasini ta’sis etish tashabbuslari ilgari surildi va qo‘llab quvvatlandi.

Muzokaralar yakunlarida ilgari surilgan tashabbuslarni amalga oshirish bo‘yicha qo‘shma chora-tadbirlar rejasini ishlab chiqish hamda hamkorlikni institutsional darajada mustahkamlash yuzasidan kelishuvga erishildi.