O‘zbekiston texnologik metallar kombinati tizimidagi TMK Smart Powder va Koreya Respublikasining kukun metallurgiyasi sohasidagi yetakchi kompaniyasi Korea Powder Metallurgy o‘rtasida uzoq muddatli sanoat hamkorligi yo‘lga qo‘yildi.
Ushbu kelishuv doirasida O‘zbekistonda kukun metallurgiyasi asosida avtomobil sanoati uchun yuqori aniqlikdagi ehtiyot qismlar ishlab chiqarish tashkil etiladi. Bu sanoatda ilg‘or texnologiyalar transferi va yuqori qo‘shilgan qiymatli mahsulotlar ishlab chiqarish sari muhim qadamdir.
Loyiha O‘zbekiston Respublikasi Prezidenti Shavkat Mirziyoyev tomonidan belgilangan sanoatni chuqur modernizatsiya qilish, texnologiyalar transferi va eksportbop mahsulotlar ishlab chiqarish bo‘yicha ustuvor vazifalarga to‘liq mos keladi.
Asosiy natijalar:
8 turdagi mahsulot mahalliylashtiriladi
50 ga yaqin yangi ish o‘rni yaratiladi
Mahsulotlar ichki bozor bilan birga eksportga yo‘naltiriladi
Kukun metallurgiyasi — murakkab va yuqori aniqlik talab etiladigan detallarni ishlab chiqarish, metall chiqindilarini keskin kamaytirish hamda resurslardan maksimal samaradorlik bilan foydalanish imkonini beruvchi ilg‘or sanoat texnologiyasidir.
Loyiha doirasida ishlab chiqarishdagi chiqindi metall ulushi 4 foizdan oshmaydi, bu esa zamonaviy ekologik va sanoat standartlariga to‘liq javob beradi.
Muhim jihati shundaki, mazkur kelishuv TMK tizimida ilk bor texnologiya transferiga yo‘naltirilgan Technology Development Agreement formatida imzolandi va kamida 10 yillik strategik sherikchilik asosida amalga oshiriladi.
Ma’lumot uchun: Korea Powder Metallurgy — avtomobil sanoati uchun kukun metallurgiyasi asosida yuqori aniqlikdagi detallar ishlab chiqaruvchi yetakchi kompaniya bo‘lib, GM Motors Powertrain’ga to‘g‘ridan-to‘g‘ri mahsulot yetkazib beradi hamda BIQS 5 xalqaro sertifikatiga ega.
