Kanadaga xizmat safari doirasida TMK delegatsiyasi Ontario provinsiyasining Sudbury shahrida joylashgan Centre for Excellence in Mining Innovation (CEMI) innovatsiya markazida bo'ldi.
Uchrashuvda O'zbekiston va Kanada o'rtasida tog‘-kon sanoatida ilmiy-tadqiqot va innovatsion ishlanmalarni rivojlantirish, zamonaviy texnologiyalarni joriy etish hamda xalqaro ilmiy-sanoat hamkorligini kengaytirish masalalari muhokama qilindi.
Xususan, R&D yo‘nalishida qo‘shma loyihalarni amalga oshirish, CEMI ekotizimiga kiruvchi 120 dan ortiq rezident kompaniyalar bilan hamkorlikni yo‘lga qo‘yish hamda ularni TMK tasarrufidagi R&D Park va Kelajak metallari texnoparkiga jalb qilish imkoniyatlari ko‘rib chiqildi.
Muzokaralar yakunida xalqaro biznes akkreditatsiya dasturini joriy etish, shuningdek, CEMI ekotizimiga kiruvchi kompaniyalar va tadqiqot markazlari uchun O‘zbekistonga tashrif tashkil etish, TMK zavodlari va texnoparklari faoliyati bilan tanishtirish bo‘yicha kelishuvga erishildi.
Shuningdek, delegatsiya Mississauga shahridagi Process Research Ortech laboratoriyasiga ham tashrif buyurdi. Uchrashuvda laboratoriyani TMK texnoparklariga rezident sifatida jalb qilish, laboratoriya va ilmiy-tadqiqot yo‘nalishlarida qo‘shma R&D dasturlarini amalga oshirish hamda metallurgiya va qayta ishlash texnologiyalari bo‘yicha hamkorlikni rivojlantirish masalalari muhokama qilindi.
