Chexiya poytaxti Praga shahrida O‘zbekiston va Chexiya o‘rtasidagi savdo-iqtisodiy va investitsiyaviy hamkorlikni rivojlantirishga bag‘ishlangan tadbirlar bo'lib o'tdi. Unda O‘zbekiston texnologik metallar kombinati vakili ham ishtirok etdi.
Tashrif davomida Chexiya biznes vakillari ishtirokida davra suhbati va yetakchi chex kompaniyalari rahbarlari bilan ikki tomonlama uchrashuvlar o‘tkazildi.
Xususan, Chexiya Respublikasining Sanoat va savdo vazirligi bilan muzokaralarda O'zTMK vakili texnologik metallar sanoatidagi istiqbolli loyihalar, xususan, strategik xomashyo, noyob yer elementlari va kritik minerallarni o‘zlashtirish, qayta ishlash hamda eksport salohiyati bo‘yicha takliflarni ilgari surdi.
Tashrif yakunida O'zTMK Chexiya Respublikasining Sanoat va savdo vazirligi, Praga Kimyo va texnologiyalar universiteti, shuningdek, bir qator chex kompaniyalari Diamo, ZVVZ Engineering, CE Industries bilan istiqbolli kelishuvlarga erishdi.
O‘zbekiston-Chexiya o‘rtasida imzolangan hamkorlik bitimlari esa O‘zTMK uchun ham xalqaro texnik standartlar bilan uyg‘un ishlashda xizmat qiladi.
