O‘zbekiston va Koreya: kukun metallurgiyasida qo‘shma loyihaga start berildi

O‘zbekiston texnologik metallar kombinati qoshida tashkil etilgan “UTMK Smart Powder” MChJ hamda Koreya Respublikasining yetakchi kompaniyalaridan biri – Korea Powder Metallurgy Co. Ltd. o‘rtasida qo‘shma hamkorlikni yo‘lga qo‘yishga qaratilgan dastlabki shartnoma imzolandi.

Mazkur kelishuv kukun metallurgiyasi asosida detallar ishlab chiqarishda ilg‘or texnologiyalarni joriy etish hamda yangi mahsulot turlarini yaratishni ko‘zda tutadi.

 Shartnoma ikki tomon uchun ham strategik ahamiyatga ega bo‘lib, mahalliy va xalqaro bozorlarda raqobatbardosh mahsulotlar taklif etish imkonini beradi.

Uchrashuv davomida hamkorlikning ustuvor yo‘nalishlari belgilab olindi:

zamonaviy kukun metallurgiyasi texnologiyalarini O‘zbekistonda joriy etish;

yuqori sifatli sanoat detallarini ishlab chiqarishni yo‘lga qo‘yish;

mahalliy mutaxassislar malakasini oshirish va texnologiya transferini amalga oshirish;

eksportbop mahsulotlar orqali O‘zbekistonning xalqaro nufuzini mustahkamlash.

Loyihaning amalga oshirilishi mamlakat sanoat tarmoqlari uchun muhim ahamiyat kasb etib, metallurgiya sohasida yangi ishlab chiqarish quvvatlarini shakllantirish va innovatsion mahsulotlar ishlab chiqarishga keng yo‘l ochadi.

O‘zbekiston texnologik metallar kombinati qoshida tashkil etilgan “UTMK Smart Powder” – mamlakatimizda kukun metallurgiyasi yo‘nalishida yangi ufqlarni ochishga qaratilgan innovatsion korxona. 

Ushbu markaz nafaqat ilg‘or texnologiyalarni jalb etishga, balki yuqori qo‘shilgan qiymatli mahsulotlar ishlab chiqarish orqali xalqaro maydonda raqobatbardosh bo‘lishga intiladi.