Prezidentimiz Shavkat Mirziyoyev tashabbusi bilan amalga oshirilayotgan “Yashil makon” umummilliy loyihasi hamda yoshlar siyosati mamlakatimizda ekologik barqarorlikni ta’minlash, yashil hududlarni kengaytirish va yoshlar salohiyatini ro‘yobga chiqarishda muhim o‘rin tutmoqda.
Shu asosda O‘zbekiston texnologik metallar kombinati tasarrufidagi Nodir metallar va qattiq qotishmalar ishlab chiqarish zavodi yoshlari ishtirokida payshanba - "Yoshlar kuni" munosabati bilan “Rahbar va yoshlar” uchrashuvi hamda “Yashil makon” umummilliy loyihasi doirasida kompleks tadbir bo'lib o'tdi.
Tadbirning birinchi qismi “Rahbar va yoshlar” uchrashuvida 50 nafar yosh mutaxassis bilan ochiq va samimiy muloqot o‘tkazildi. Ularga TMKdagi yangi islohotlar, zamonaviy ishlab chiqarish loyihalari va innovatsion yo‘nalishlar haqida ma’lumot berildi.
O‘z navbatida yoshlar tomonidan ilgari surilgan ishlab chiqarish samaradorligini oshirish, innovatsiyalarni joriy etish va ilg‘or xalqaro tajribani keng tatbiq etishga qaratilgan qator amaliy taklif va tashabbuslar qo‘llab-quvvatlandi.
Tadbirning keyingi qismida “Yashil makon” umummilliy loyihasi doirasida TMK rahbariyati va yoshlar birgalikda daraxt ko‘chatlarini ekdi. Bu tashabbus yashil hududlarni kengaytirish, ekologik madaniyatni shakllantirish va barqaror muhit yaratishga xizmat qildi.
Bugun TMK mamlakatimiz sanoatida yoshlar salohiyati va ekologik mas’uliyatni uyg‘un holda rivojlantirmoqda!
