“O‘zbekiston texnologik metallar kombinati” AJ delegatsiyasi Buyuk Britaniyada o‘tkazilayotgan “Investor Day” tadbiri doirasida jahonning yetakchi moliyaviy institutlari va investitsiya banklari bilan qator muzokaralar o‘tkazdi.
Jumladan, ICBC Standard Bank, MUFG, Standard Chartered, Deutsche Bank kabi yirik xalqaro banklar bilan uchrashuvlar tashkil etildi. Muzokaralar davomida TMK tomonidan amalga oshirilayotgan strategik investitsiya loyihalari, xususan volfram va molibden klasterlarini rivojlantirish, yangi qazib olish va qayta ishlash quvvatlarini tashkil etish, yuqori qo‘shilgan qiymatli mahsulotlar ishlab chiqarish hamda eksport salohiyatini kengaytirish masalalari taqdim etildi.
Shuningdek, xalqaro moliya institutlari bilan quyidagi yo‘nalishlarda hamkorlik qilish imkoniyatlari muhokama qilindi:
— investitsiya mablag‘larini jalb qilish;
— eksportni moliyalashtirish mexanizmlarini joriy etish;
— yirik sanoat loyihalarini project finance asosida moliyalashtirish;
— xalqaro kapital bozorlariga chiqish;
— yevrobond chiqarish imkoniyatlari;
— IPO va xalqaro investorlar ishtirokini kengaytirish.
Mazkur uchrashuvlarda xorijiy moliyaviy institutlarning O‘zbekistonda kritik xomashyo sohasini rivojlantirish, mamlakatning global ta’minot zanjiridagi o‘rnini mustahkamlash va texnologik metallar sanoatiga bo‘lgan qiziqishi yuqori ekani namoyon boʻldi.
