O‘zbekiston va Buyuk Britaniya o‘rtasida siyosiy, iqtisodiy, ilmiy va innovatsion hamkorlik yangi bosqichga ko‘tarilmoqda. Buyuk Britaniyaning O‘zbekistondagi elchisi Timoti Smart boshchiligidagi delegatsiyaning TMK bilan bugungi uchrashuvi ham mana shu jarayonning muhim bir qismi bo‘ldi.
Uchrashuvda TMK hamda Buyuk Britaniya hamkorlikda kritik minerallar sohasida amalga oshirishi mumkin bo‘lgan muhim tashabbuslar muhokama qilindi.
Xususan, kelgusi yilda Buyuk Britaniyada xalqaro moliya institutlari, sanoat kompaniyalari va davlat idoralari ishtirokida O‘zbekistonning kritik minerallariga bag‘ishlangan yirik Roadshow tashkil etish bo‘yicha kelishuvga erishildi.
Buyuk Britaniya elchisi TMKga:
“UK Critical Minerals Association”ga a’zo bo‘lish;
O‘zbekistonning EITI (Extractive Industries Transparency Initiative) tashabbusiga qo‘shilishi;
G7 davlatlarining Connex tashabbusi — xalqaro standartlarga asoslangan muzokara platformasiga a’zo bo‘lish bo‘yicha o'z takliflarini bildirdi. Bu a’zoliklar O‘zbekistonga to‘g‘ridan-to‘g‘ri investitsiyalar oqimini oshirishga xizmat qiladi.
Shuningdek, uchrashuvda ta'lim sohasidagi samarali tashabbuslar diqqat markazida bo‘ldi:
Chevening dasturi orqali magistratura bosqichini birgalikda moliyalashtirish, soha bo‘yicha iqtidorli yoshlarni Buyuk Britaniyada ta’lim olishi;
Tan olingan Nobel mukofoti sovrindorlari bilan yosh tadqiqotchilar uchun davra suhbatlari tashkil etish maqsadida ularni O‘zbekistonga taklif qilish tashabbuslari qo‘llab-quvvatlandi.
