O‘zbekiston texnologik metallar kombinati (TMK) bosh ofisida Buyuk Britaniya xalqaro banki Standard Chartered Bank vakillari bilan uchrashuv bo‘lib o‘tdi.
Mazkur uchrashuv 2026-yilgi Toshkent xalqaro investitsiya forumi doirasida imzolangan Hamkorlik memorandumi asosidagi oʻzaro aloqalarning navbatdagi amaliy bosqichi bo‘ldi.
Standard Chartered bosh qarorgohi Londonda joylashgan Buyuk Britaniyaning yetakchi xalqaro bank guruhlaridan biri. 170 yildan ortiq tarixga ega bank 50 dan ortiq bozorlarda faoliyat yuritib, ayniqsa Osiyo, Afrika va Yaqin Sharq mamlakatlarida keng faoliyat olib boradi.
Uchrashuv davomida tomonlar TMKning investitsiya dasturi, amaldagi va istiqbolli loyihalari, shuningdek, ularni moliyalashtirishning mumkin bo‘lgan tuzilmalari va zamonaviy moliyaviy instrumentlarini muhokama qildilar.
Alohida e’tibor eksport-kredit agentliklari (ECA) kafolati bilan moliyalashtirishni jalb etish, xalqaro kapital va bank moliyalashtirish mexanizmlaridan foydalanish hamda istiqbolli sanoat loyihalarini moliyalashtirish imkoniyatlariga qaratildi.
Standard Chartered bilan hamkorlik TMKning xalqaro moliya institutlari bilan aloqalarini mustahkamlash va investitsiya loyihalari uchun yangi moliyalashtirish imkoniyatlarini kengaytirishga xizmat qilmoqda.
