So‘nggi yillarda mamlakatimizda Prezidentimiz Shavkat Mirziyoyev ilgari surgan sanoat-ilm-fan-ishlab chiqarish zanjiri asosida kadrlar tayyorlash tizimi amaliyotga keng joriy etilmoqda. O‘zbekiston texnologik metallar kombinati esa ushbu yo‘nalishni o‘zining ustuvor vazifalaridan biri sifatida belgilab, zamonaviy, malakali mutaxassislar tayyorlashga alohida e’tibor qaratmoqda.
TMK vakillarining Buyuk Britaniyada dunyo konchilik, geologiya va mineral resurslar sohasidagi nufuzli ta’lim markazlaridan biri Kamborn konchilik maktabiga tashrifi ham shu maqsadga qaratilgan bo’lib, unda bir qator kelishuvlarga erishildi:
⚡️ Texnologik metallar oliy maktabida Britaniya ta’lim standartlarini joriy etish;
⚡️ “1+1” qo‘shma magistratura dasturini yo‘lga qo‘yish;
⚡️ talaba va professorlar almashinuvi, ilmiy-tadqiqot ishlarini birgalikda amalga oshirish;
⚡️mineral resurslar va texnologik metallar bo‘yicha zamonaviy laboratoriya tajribasini O‘zbekistonga transfer qilish.
Shuningdek, TMK vakillari tashrif davomida Kamborn konchilik maktabining ilg‘or laboratoriyalari, zamonaviy ta’lim infratuzilmasi, mineralogiya, gidrometallurgiya, kon injiniringi va geotexnika bo‘yicha ilg‘or uskunalar va tadqiqot maydonlari bilan tanishdi.
Ushbu tashrif Buyuk Britaniyaning Toshkentdagi elchixonasi hamda Cornwall Mining and Geo-Resources Alliance ko‘magida amalga oshirildi.
_1764666290.jpg)
