Ayni kunlarda Qozog'istonning Ostona shahrida MINEX Kazakhstan-2026 xalqaro tog‘-kon va geologiya forumi bo‘lib o‘tmoqda. Mazkur forumda O'zbekiston texnologik metallar kombinati delegatsiyasi ham faol ishtirok etib, xalqaro hamkorlar bilan muloqotlarni kengaytirmoqda.
Forum doirasida TMK vakillari global investorlar va sanoat yetakchilari bilan uchrashuvlar o‘tkazib, yangi loyihalar va qo‘shma tashabbuslar uchun amaliy imkoniyatlarni ko‘rib chiqmoqda. Shu bilan birga, O‘zbekistonning geologik salohiyati va “kon-metall-bozor” asosidagi integratsiyalashgan sanoat modeli xalqaro hamjamiyatga taqdim etilmoqda.
Ta’kidlash joizki, MINEX formati 2025-yil iyun oyida dastlab O‘zbekistonda Tog‘-kon va geologiya vazirligi hamda TMK tashabbusi bilan muvaffaqiyatli tashkil etilgan edi. Qizg‘in bahs va samarali networking maydoniga aylangan ushbu forumda 21 ta mamlakatdan 200 dan ortiq diplomatik missiyalar vakillari, xalqaro kompaniyalar, investorlar va geologiya sohasining yetakchi ekspertlari ishtirok etgan.
