🌐 Bugun taraqqiyot ilm-fan, innovatsiya va ishlab chiqarishning uzviy bog‘liqligiga tayanmoqda. Istiqbolli ilmiy ishlanmalarni amaliyotga tatbiq etish va tijoratlashtirish esa yangi texnologik taraqqiyotning muhim shartiga aylanmoqda.
🗓 27–29-oktabr kunlari Yangi Toshkent hududidagi CAEx Uzbekistan xalqaro ko‘rgazma markazida “InnoWeek-2026” xalqaro innovatsion g‘oyalar haftaligi bo‘lib o‘tadi. “O‘zgarayotgan dunyo uchun ilg‘or innovatsiyalar” shiori ostidagi tadbir doirasida ko‘rgazma va yarmarka, forumlar, tanlovlar hamda mahalliy va xalqaro kompaniyalar vakillari bilan uchrashuvlar tashkil etiladi.
💼 O‘zbekiston texnologik metallar kombinati (TMK) haftalikda ilm-fan va ishlab chiqarishni bog‘laydigan ishlanma va texnologik yechimlarini namoyish etadi. TMK R&D Park tomonidan ilmiy ishlanmalar va tajriba namunalari, yangi innovatsion loyihalar, additiv texnologiyalar asosidagi mahsulot va prototiplar, shuningdek, yuqori tozalikdagi va sof metall namunalari taqdim etiladi.
🤖 Raqamli texnologiyalar yo‘nalishida TMK tomonidan ishlab chiqilayotgan ScienceXchange platformasi hamda sun’iy intellektning geologiya, konchilik, ishlab chiqarish, ilmiy tadqiqotlar va boshqaruv jarayonlarida qo‘llanilishiga oid amaliy yechimlar namoyish etiladi.
💡 Haftalik davomida istiqbolli innovatsion g‘oyalar, ilmiy ishlanmalar va texnologik yechimlar saralanib, “G‘oyalar banki” shakllantiriladi. Eng istiqbolli loyihalarni R&D Park bazasida rivojlantirish, tajriba-sinovdan o‘tkazish, tijoratlashtirish va moliyalashtirish bo‘yicha takliflar ishlab chiqiladi.
🎓 Yoshlarning ilmiy va innovatsion salohiyatini qo‘llab-quvvatlashga ham alohida e’tibor qaratiladi. Talabalar, magistrantlar, yosh olimlar va tashabbuskorlar o‘rtasida innovatsion g‘oyalar, amaliy ishlanmalar, ilmiy maqolalar va texnologik yechimlar bo‘yicha ochiq tanlov tashkil etiladi. Shuningdek, startaplar va ilmiy tashkilotlarni R&D Park rezidentligiga jalb etish, yosh tadqiqotchilar bilan hamkorlikni kengaytirish rejalashtirilgan.
📍 27–29-oktabr | CAEx Uzbekistan
