“O‘zbekiston keng geologik boyliklar va jadal rivojlanayotgan kon-metallurgiya sanoatiga ega. Sizlar qazib olishda o‘zingiz egalik qilishni, o‘z sanoatingizni rivojlantirishni, ish o‘rinlari yaratishni, malaka va bilimlarni shakllantirishni, hamda qiymat zanjiri bo‘ylab yuqoriga ko‘tarilishni xohlaysiz. Yevropa taklifining tub mohiyati ham aynan shu”, — deydi Yevropa Ittifoqining O‘zbekistondagi elchisi Toivo Klaar MINEX Central Asia 2025 doirasidagi 1-sessiyada.
“Muhim foydali qazilmalar ekotizimlarini shakllantirish maqsadida mintaqaviy hamkorlik va strategik sheriklik” mavzusidagi mazkur sessiyada Markaziy Osiyoda tog‘-kon sanoati hamda muhim xomashyolarning kelajagiga oid qarashlar taqdim etildi.
Spikerlar Markaziy Osiyo – umumiy geologik salohiyatga ega hudud sifatida – barqaror va xavfsiz metall hamda mineral yetkazib berish zanjirlarining global markaziga aylanish uchun noyob imkoniyatlarga ega ekanligini ta'kidladi.
Shuningdek, sessiya davomida ishtirokchilar transchegaraviy investitsiyalarni kengaytirish, tog‘-kon sohasi va xomashyo materiallari bo‘yicha uzoq muddatli sheriklik aloqalarini yo‘lga qo‘yish borasidagi qarashlari bilan o‘rtoqlashdilar.
