Forum Markaziy Osiyo xalqaro institutida o‘tkazilib, "Toshkent platformasi: Markaziy Osiyo va Yevropa o‘rtasida ko‘priklar qurish" mavzusiga bag‘ishlandi.
Rasmiy shaxslar, diplomatik missiya rahbarlari va vakillari, mahalliy va xorijiy hukumat tahliliy markazlari, biznes vakillari ishtirok etgan ushbu muhim tadbirning uchinchi sessiyada O‘zTMKning xorijlik eksperti Han Ilhan nutq so‘zladi.
Ushbu sessiya kritik minerallarni Yevropa va Markaziy Osiyo o‘rtasidagi barqaror texnologik, savdo va “yashil” hamkorlikning harakatlantiruvchi kuchi sifatidagi roliga bag‘ishlandi.
Asosiy muhokamalar qazib olish, qayta ishlash va mas’uliyatli ta’minot orqali qayta tiklanuvchi energetika, raqamli iqtisodiyot va yuqori texnologiyali sohalar uchun zarur bo‘lgan minerallar bilan ta’minlash masalalariga qaratildi.
O‘zTMKning xorijlik eksperti Han Ilhan atrof-muhitni muhofaza qilishga qaratilgan barqaror qazib olish usullariga investitsiya kiritish imkoniyatlarini hamda kritik minerallar bilan barqaror ta’minotni ta’minlash masalalarini muhokamaga qo'ydi.
Shuningdek, sessiya davomida qazib olish sohasida innovatsiyalar hamda samaradorlikni oshirish bo‘yicha bilim va tajriba almashinuvi masalalari ham ko‘rib chiqildi.
