Turkiyaning Anqara shahrida 24-25-iyun kunlari o‘tkazilayotgan MINEX Asia 2026 xalqaro forumi kritik minerallar bo‘yicha dunyoning yetakchi siyosatchilari, investorlari va sanoat vakillarini bir maydonga jamladi.
Forum doirasidagi "Global strategik ta’minot yo‘lagi bo‘lgan O‘rta Koridor: Turkiya, Buyuk Britaniya va Yevropa muhim minerallar ta’minotida saflarni birlashtirmoqda" mavzusidagi sessiyada TMK Xalqaro iqtisodiy aloqalar va diplomatik hamkorlik departamenti direktori Timur Xikmatullayev spiker sifatida ishtirok etib, "Unlocking Uzbekistan’s Critical Raw Materials" mavzusida taqdimot o‘tkazdi.
Sessiyada O‘zbekistonning xalqaro qiymat zanjirlariga integratsiyasi, xorijiy mamlakatlar bilan sanoat hamkorligini kengaytirish istiqbollari ham muhokama markazida bo'ldi.
Shuningdek, TMKning O‘zbekistonda kritik minerallarni geologik qidiruvdan boshlab chuqur qayta ishlash va yuqori qo‘shilgan qiymatli tayyor mahsulot ishlab chiqarishgacha bo‘lgan integratsiyalashgan "Kon–Metall–Bozor" modeli, mamlakatning boy mineral-xomashyo salohiyati, investitsion imkoniyatlari hamda xalqaro hamkorlik yo‘nalishlari keng yoritildi.
Mazkur forumdagi ishtirok O‘zbekistonni ishonchli va uzoq muddatli kritik minerallar ta’minot zanjirining muhim bo‘g‘iniga aylantirishga xizmat qiladigan yana bir muhim qadam bo'ldi.
