O‘zbekiston texnologik metallar kombinati (TMK) Yevropa Ittifoqining Horizon Europe dasturi doirasida moliyalashtiriladigan TiBeRIUM xalqaro loyihasida g‘olib bo‘ldi.
Bu orqali TMK ilk bor Yevropa Ittifoqining eng yirik va raqobatbardosh ilmiy-tadqiqot hamda innovatsiya dasturida ishtirok etmoqda.
TiBeRIUM (Titanium and Beryllium for European Resilience and Innovative Utilization of Minerals) loyihasi kritik minerallar bo‘yicha barqaror ta’minot zanjirlarini shakllantirish, titan va berilliy uchun ilg‘or “yashil” qayta ishlash texnologiyalarini rivojlantirish va mintaqada kompleks ilmiy tadqiqotlar o‘tkazishga qaratilgan.
Loyiha konsorsiumi 12 ta davlatdan 25 ta hamkor tashkilotni birlashtiradi va unga Germaniyaning Freiberg konchilik va texnologiyalar universiteti koordinatorlik qiladi.
Muhim jihati, TiBeRIUM doirasida O‘zbekiston resurs yetkazib beruvchi emas, ilmiy izlanishlar, texnologik yechimlar va uning transferi, ekologik samarali qayta ishlash yo‘nalishlarida to‘laqonli hamkor sifatida ishtirok etmoqda.
Loyiha joriy yilning may oyidan boshlanishi ko‘zda tutilgan.
