Bugungi Yoshlar kuni munosabati bilan O‘zbekiston Respublikasi Texnik jihatdan tartibga solish agentligida yosh mutaxassislar, mustaqil tadqiqotchilar hamda ilmiy faoliyat bilan shug‘ullanayotgan iqtidorli yoshlar ishtirokida ochiq muloqot tashkil etildi.
Unda O‘zbekiston texnologik metallar kombinati Boshqaruv raisining yangi texnologiyalar, innovatsiyalar va sun’iy intellektni rivojlantirish bo‘yicha o‘rinbosari Amir Abidov ishtirok etib, zamonaviy texnologiyalar, innovatsiyalar hamda kritik minerallar sanoatining istiqbollari yuzasidan o‘z fikr va tajribalari bilan o‘rtoqlashdi.
Uchrashuvda kritik minerallar global iqtisodiyot, yuqori texnologiyalar, sun’iy intellekt, elektromobillar, yarimo‘tkazgichlar va yashil energetika rivojining asosi ekani alohida ta’kidlandi.
Shu nuqtai nazardan, O‘zbekiston texnologik metallar kombinati (TMK) mamlakatimizda yuqori qo‘shilgan qiymat yaratishga xizmat qiluvchi zamonaviy ishlab chiqarish, ilmiy-tadqiqot va innovatsion ekotizimni shakllantirish bo‘yicha keng ko‘lamli loyihalarni amalga oshirayotgani qayd etildi.
Shuningdek, yoshlarning ilmiy salohiyatini ro‘yobga chiqarish, innovatsion g‘oyalarni amaliy loyihalarga aylantirish, startaplarni qo‘llab-quvvatlash hamda ilm-fan va sanoat integratsiyasini kuchaytirish masalalari yuzasidan fikr almashildi.
