Bugungi kunda O‘zbekiston texnologik metallar kombinati ESG yo‘nalishida Buyuk Britaniya, Belgiya, AQSH, Kanada va BAA kabi qator mamlakatlar bilan hamkorlik aloqalarini yo‘lga qo‘ygan.
Yaqinda TMK delegatsiyasining ESG yo‘nalishida hamkorlik masalalari yuzasidan Xitoyga tashrifi ham mana shu aloqalarni yanada kengaytirishga xizmat qildi.
Delegatsiya a'zolari Sian va Usi shaharlarida bo‘lib, dunyoning yetakchi “yashil energiya” kompaniyalaridan biri — LONGi Groupda amaliy tashrif va muzokaralar o‘tkazdi.
Tashrif doirasida yashil quyosh panellari (Green Solar) va yashil vodorod (Green Hydrogen) texnologiyalarini chuqur o‘rganish hamda ularni TMKning ishlab chiqarish jarayonlariga joriy etish masalalari muhokama qilindi.
Muzokaralar davomida LONGi Group’ning texnologik salohiyati va sanoat miqyosidagi yechimlari atroflicha tahlil qilinib, hamkorlikni aniq yo‘l xaritasi asosida bosqichma-bosqich rivojlantirish bo‘yicha kelishuvga erishildi.
Yuqori samaradorlikka ega yashil energiya manbalarini keng joriy etish orqali TMK mahsulotlari Yevropa Ittifoqining ekologik va texnik standartlariga mosligi ta’minlanadi.
Ma’lumot uchun, LONGi Hydrogen Technology Xitoyning yirik energetik korxonalaridan biri bo‘lib, 2023-yilda uning ishlab chiqarish quvvati 2,5 GVtga yetgan. Ushbu ko‘rsatkich orqali kompaniya yashil vodorod texnologiyalari bo‘yicha global yetakchi maqomini olgan.
