Gonkong Ma’muriyati boshchiligidagi delegatsiyaning O‘zbekistonga tashrifi doirasida Toshkentda biznes-brifing hamda davra suhbati tashkil etildi. Uchrashuv sanoat, moliya, logistika, IT va qurilish sohalarida faoliyat yurituvchi Gonkongning 120 dan ortiq yetakchi kompaniyalari vakillarini bir davraga jamladi.
O‘zbekiston texnologik metallar kombinati (TMK) mazkur tadbirda faol ishtirok etib, dunyoning eng yirik tog‘-kon va metallurgiya xoldinglaridan biri Shaanxi Non-ferrous Metals Holding Group bilan hamkorlik memorandumini imzoladi.
Shaanxi Non-ferrous Metals Holding Group tarkibiga 30 dan ortiq sho‘ba korxona kiradi va unda 40 mingdan ziyod xodim faoliyat yuritadi.
➡️ Xolding tarkibida dunyoning eng yirik molibden ishlab chiqaruvchilaridan biri bo‘lgan Jinduicheng Molybdenum Co., Ltd. kompaniyasi faoliyat yuritadi.
➡️ Aerokosmik va sanoat tarmoqlari uchun titan hamda titan qotishmalarini ishlab chiqaruvchi dunyoning yetakchi korxonalaridan biri Baoti Group mazkur kompaniya tarkibiga kiradi.
➡️ Xolding tog‘-kon va metallurgiya obyektlarini loyihalash hamda qurish bo‘yicha o‘zining loyiha institutlari va injiniring markazlariga ega.
➡️ Korporatsiya geologik qidiruv, qazib olish, boyitish, metallurgik qayta ishlash va yuqori qo‘shilgan qiymatli mahsulotlar ishlab chiqarishni qamrab oluvchi integratsiyalashgan sanoat ekotizimini shakllantirgan.
TMK hamda Shaanxi Non-ferrous Metals Holding Group o'rtasida imzolangan hamkorlik memorandumi:
➡️ geologiya-qidiruv ishlari,
➡️kritik minerallarni qazib olish va qayta ishlash,
➡️zamonaviy texnologiyalar transferi,
➡️ilmiy-tadqiqot faoliyati, kadrlar tayyorlash;
➡️istiqbolli investitsiya loyihalarini birgalikda amalga oshirish yo‘nalishlarida hamkorlikni rivojlantirish uchun mustahkam asos yaratadi.
