O‘zbekiston texnologik metallar kombinati va Shveysariyaning nufuzli SGS kompaniyasi vakillari o‘rtasida hamkorlik uchrashuvi bo'lib o'tdi.
Unda TMK tomonidan tashkil etilayotgan Markaziy nano-analitik laboratoriya faoliyatini SGS bilan hamkorlikda tizimli yo‘lga qo‘yish masalasi muhokama qilindi.
SGS kompaniyasining O‘zbekiston bo‘yicha direktori Dilshod Jo‘rayev TMKning bu yo'nalishda amalga oshirayotgan ishlarini yuqori baholab, Markaziy nano-analitik laboratoriya uchun dunyodagi yetakchi brendlarning ilg‘or va zamonaviy uskunalari tanlanayotganini alohida e’tirof etdi.
SGS bilan hamkorlik doirasida quyidagi yo‘nalishlar ko‘zda tutilmoqda:
🔘 Markaziy nano-analitik laboratoriyada zamonaviy menejment tizimini joriy etish;
🔘Yuqori malakali laboratoriya mutaxassislarini tayyorlash;
🔘Ilg‘or dasturiy ta’minotlarni joriy qilish;
🔘Laboratoriyaning xalqaro akkreditatsiyasini ta’minlash.
Shuningdek, uchrashuv davomida kritik minerallar konlarini o‘zlashtirish, geologiya-qidiruv va loyihalashtirish bo'yicha hamda TMK Oliy maktabi bilan ilmiy-amaliy hamkorlik o'rnatish masalalari muhokama qilindi.
