Global metall bozorida 30 yildan ortiq tajribaga ega, dunyoning turli mintaqalaridagi ishlab chiqaruvchilar va yirik sanoat iste’molchilari o‘rtasida strategik ko‘prik vazifasini bajarayotgan AQShning ishonchli kompaniyalaridan biri CCMA LLC vakillari bilan TMK bosh ofisida uchrashuv bo‘lib o‘tdi.
Unda tomonlar volfram sanoatidagi hamkorlik istiqbollari, mavjud imkoniyatlar va qo‘shma loyihalar bo‘yicha batafsil muzokara olib bordilar hamda TMK tomonidan ishlab chiqarilayotgan volfram metallini AQShning CCMA LLC kompaniyasiga eksport qilish bo‘yicha dastlabki kelishuvga erishildi.
Bu kelishuv TMK eksport salohiyatining oshishi va xalqaro bozorga chiqishda yanada kuchli pozitsiyalarni shakllantirishi bilan birga, O‘zbekistonning yirik strategik konlariga xalqaro kapital kirib kelishi, texnologik yangilanishlar, zamonaviy boyitish va qayta ishlash quvvatlarining kengayishi uchun imkoniyatlar yaratadi.
Shuningdek, uchrashuv davomida kritik metallar segmentida xalqaro miqyosda ishonchli hamkor sifatida tanilgan CCMA kompaniyasi vakillari volfram bo‘yicha investitsiya loyihalarida ishtirok etishga ham yuqori qiziqish bildirdi.
