Xabaringiz bor, TMK delegatsiyasi Chili Respublikasining Vina-del-Mar shahrida Xalqaro Molibden Assotsiatsiyasi anjumanida ishtirok etdi.
Anjumanda “2024-yilda molibden iste’moli”, “Molibden parchalari va chiqindilarini qayta ishlash tahlili”, “Molybdenum mark" ishonch belgisiga erishish yo‘li”, “IMOA dasturlarining a’zolar uchun afzalliklari” va shu kabi muhim masalalar ko‘rib chiqildi hamda muhokama qilindi.
Unda TMK vakillari ham faol ishtirok etib, Anglo American (Buyuk Britaniya), Glencore International AG (Shveysariya), Rio Tinto (Avstraliya), Mitsubishi Corporation (Yaponiya), Codelco (Chili) va shu kabi 40 dan ortiq molibden sohasida faoliyat yuritayotgan yetakchi korxonalar va savdo kompaniyalari bilan muzokaralar o‘tkazdi.
Uchrashuv natijasida sanoat uchun muhim metallar xomashyosini TMKga yetkazib berish, tayyor mahsulotlarni Yevropa, AQSh va Janubi-Sharqiy Osiyo bozorlariga sotish hamda ushbu sohada tajriba almashishga kelishib olindi.
