Texnologik metallar oliy maktabining bakalavr bosqichiga qabul imtihonlari muvaffaqiyatli o‘tkazildi. Kuni kecha bo’lib o’tgan so’nggi bosqichda nomzodlar o‘zlarining kasbiy tayyorgarligi, fikrlash qobiliyati hamda texnik bilimlarini namoyish etdilar. Imtihon jarayonlari belgilangan tartib asosida, ochiq va shaffof muhitda tashkil etildi.
Texnologik metallar oliy maktabiga qabul qilingan yoshlar Piza universitetining (Italiya) Toshkentdagi filialida tahsil olishadi.
Ma’lumot uchun, ushbu oliy maktabda darslar ingliz tilida olib boriladi. Talabalar dual ta’lim tamoyili asosida nazariy bilimlarni oliygohda, amaliyotlarini esa bevosita TMK korxonalarida o‘tashadi. 4-kursning 2-semestrida talabalar Italiyada tahsil olish imkoniyatiga ega bo‘ladilar.
Bu hali hammasi emas! TMK tomonidan eng iqtidorli abituriyentlar uchun 25 ta grant ajratilgan. Ya’ni bakalavr bosqichiga kirgan talabalar 4 yil grant asosida tahsil olishadi. Ushbu grant sohiblari kimlar? Natijalar 31-iyulga qadar TMKning ijtimoiy tarmoqlaridagi rasmiy sahifalarida e’lon qilinadi. Bizni kuzatishda davom eting.
