Texnologik metallar adabiyotida yangi sahifa
O‘zbekiston texnologik metallar kombinati bugungi kunda kritik minerallar va texnologik metallar bo‘yicha adabiyotlarni, sohaga oid ilmiy-tadqiqotlarni qo‘llab-quvvatlash hamda ilmiy manbalarni keng ommaga taqdim etish maqsadida yangi platforma yaratishni rejalashtirmoqda. Shu maqsadda, kuni kecha O‘zTMK va Alisher Navoiy nomidagi O‘zbekiston Milliy kutubxonasi rahbariyati ishtirokida muhim uchrashuv bo‘lib o‘tdi.
Unda har ikki tomon mavjud adabiyotlarni tizimlashtirish, tog‘-kon sanoati va geologiya sohasining rivojlanishida ilmiy manbalar muhim o‘rin tutishi, shuningdek, sohaga oid ma’lumotlarga bo‘lgan ehtiyoj tobora ortib borayotganini ta’kidladi. Shu boisdan, O‘zTMK mas’ullari texnologik metallar bo‘yicha ilmiy va texnik adabiyotlarni jamlash hamda ushbu yo‘nalishda mutaxassislar va tadqiqotchilar uchun maxsus kutubxona tashkil etilayotganini ta’kidladi. Mazkur loyiha doirasida O‘zbekiston Milliy kutubxonasi bilan hamkorlik o‘rnatish, kutubxonaning boy tajribasidan samarali foydalanish, adabiyotlar fondini kengaytirish va ilmiy izlanishlar uchun qulay muhit yaratishda muhim ahamiyat kasb etishi aytib o’tildi.
Muzokaralar natijasida ikki tomon o‘rtasida hamkorlik memorandumi imzolandi, bu esa kelgusida sohaga oid adabiyotlar bazasini shakllantirish, ilmiy-tadqiqot ishlarini qo‘llab-quvvatlash va mutaxassislar uchun yangi imkoniyatlar yaratishga zamin yaratadi.
