TMK va Xitoy geofanlar universiteti (China University of Geosciences, XGU, Uxan) vakillari o‘rtasida bo‘lib o‘tgan uchrashuvda ilmiy-ta’limiy hamkorlikni kengaytirish bo‘yicha bir qator muhim kelishuvlarga erishildi.
Jumladan, XGU bilan hamkorlikda tashkil etilgan “Yashil konchilik ilg‘or muhandislik maktabi” va “1+1” modelidagi qo‘shma magistrlik dasturi asosida 10 nafar TMK magistranti birinchi yilni O‘zbekistonda, ikkinchi yilni esa Xitoyda o‘qishi belgilandi. Bitiruvchilar har ikki oliygohning diplomi bilan taqdirlanadi.
"Magistrantlarni tayyorlash TMK bilan hamkorligimizning birinchi bosqichi, keyingi bosqichlarda biz qo‘shma yozgi va qishki maktablar tashkil etish, xodimlar uchun amaliyot dasturlarini yo‘lga qo‘yishni rejalashtiryapmiz", - dedi XGU vitse-prezidenti doktor Xia Fan.
Uchtashuvda, shuningdek, TMK muhandislari va nano-analitik laboratoriya xodimlarini Xitoyga amaliyotga yuborish, zamonaviy uskunalar bilan ishlash, ilmiy-texnik malaka oshirish va tajriba almashish bo‘yicha dasturlar ishlab chiqilishi belgilandi.
Jumladan, Xitoylik talabalarning TMK tasarrufidagi Nodir metallar va qattiq qotishmalar zavodida amaliyot o‘tashi yuzasidan bildirilgan taklif ijobiy baholandi.
Tomonlar talabalar va yosh mutaxassislar uchun intensiv o‘quv kurslari o‘tkazish hamda o‘zaro talabalar almashinuvi va amaliyot dasturlarini yo‘lga qo‘yish bo‘yicha ham kelishib oldilar.
