Ayni paytda O‘zbekiston texnologik metallar kombinati delegatsiyasi Xitoyda bo‘lib turibdi. Bir hafta davom etadigan mazkur tashrif davomida TMK vakillari Xitoyning Xiamen Tungsten (XTC) kompaniyasiga qarashli zavodlar faoliyati, ishlab chiqarish quvvatlari va yangi texnologiyalar bilan tanishishi rejalashtirilgan.
Bugun delegatsiya tashrif dasturining ilk manzili bo‘lgan Chengdu shahridagi XTC Molibden zavodiga tashrif buyurdi. Mazkur zavod molibdenni eritish, kukun va qotishma mahsulotlar ishlab chiqarishga ixtisoslashgan.
Tashrif davomida TMK delegatsiyasi zavodning ishlab chiqarish jarayonlari, zamonaviy texnologiyalari va mahsulotlari bilan yaqindan tanishdi.
Shundan so‘ng tomonlar molibden va volfram sohasidagi hamkorlikni kengaytirish masalalarini muhokama qildilar. Xususan, O‘zbekistonda yangi gidrometallurgiya quvvatlarini barpo etish hamda “Kelajak metallari” texnoparki doirasida qo‘shma ishlab chiqarish klasterlarini tashkil etish istiqbollari ko‘rib chiqildi.
TMK va Xiamen Tungsten bilan kelgusida amalga oshiriladigan qo‘shma loyihalar nafaqat O‘zbekiston sanoati, balki global kritik minerallar bozorida ham sezilarli ahamiyat kasb etishi kutilmoqda.
