O‘zbekiston texnologik metallar kombinati (TMK) bosh ofisida Kanadaning Yerni masofadan kuzatish va geofazoviy tahlil yo‘nalishida faoliyat yurituvch EarthDaily kompaniyasi bilan uchrashuv bo‘lib o‘tdi.
Uchrashuv davomida geologik qidiruv jarayonlarida sun’iy intellekt va masofadan zondlash texnologiyalaridan foydalanish imkoniyatlari muhokama qilindi hamda kompaniyaning geologik qidiruv ishlari uchun ishlab chiqilgan, sun’iy intellekt bilan integratsiyalashgan Marigold platformasi taqdim etildi.
Mutaxassislar platformaning sun’iy yo‘ldosh tasvirlarini avtomatik tahlil qilish, ma’lumotlarni shovqinlardan tozalash hamda istiqbolli geologik hududlarni aniqlash imkoniyatlari haqida batafsil ma’lumot berdilar.
Marigold sun’iy intellekt yordamida istiqbolli qidiruv hududlarini prognozlaydi. Bu esa geologlarga burg‘ilash uchun ustuvor maydonlarni aniqlash, qidiruv ishlarini optimallashtirish hamda vaqt va xarajatlarni sezilarli darajada qisqartirish imkonini beradi.
Muzokaralar davomida platformaning O‘zbekiston geologik sharoitlarida qo‘llanish imkoniyatlari, natijalarning ishonchliligi hamda sun’iy yo‘ldosh ma’lumotlarini qayta ishlash algoritmlari muhokama markazida boʻldi.
Tomonlar geologik qidiruv jarayonlarini raqamlashtirish, sun’iy intellekt yechimlarini joriy etish hamda zamonaviy geofazoviy texnologiyalar bo‘yicha hamkorlik istiqbollari yuzasidan fikr almashdilar.
