Bugun Toshkent shahrida O‘zbekiston–Koreya biznes forumi bo‘lib o‘tdi. Forum ikki mamlakat ishbilarmon doiralari o‘rtasidagi savdo-iqtisodiy, investitsiyaviy va sanoat kooperatsiyasini kengaytirishga qaratilgan muhim muloqot maydoniga aylandi.
Forumda Koreya Importchilar assotsiatsiyasi — KOIMA, Koreya Respublikasining O‘zbekistondagi diplomatik vakolatxonasi, KOTRA, Xorijiy investitsiyalarni jalb etish agentligi hamda Koreyaning qator kompaniyalari vakillari ishtirok etdi.
Forumning asosiy sessiyasida O‘zbekiston texnologik metallar kombinati (TMK) Xalqaro iqtisodiy aloqalar va diplomatik hamkorlik departamenti direktori Timur Xikmatullayev spiker sifatida qatnashib, TMKning faoliyati, eksport salohiyati va xalqaro hamkorlik imkoniyatlariga bag‘ishlangan taqdimot o‘tkazdi.
Shuningdek, forum doirasida TMK vakillari Koreyaning GS Global Corp. hamda TM International Co., Ltd. kompaniyalari bilan B2B muzokaralar olib bordi. Uchrashuvlarda TMK mahsulotlarini Koreya bozoriga eksport qilish, yangi savdo aloqalarini yo‘lga qo‘yish va hamkorlik ko‘lamini kengaytirish masalalariga alohida e’tibor qaratildi.
Koreya Respublikasi yuqori texnologiyali ishlab chiqarish, avtomobilsozlik va zamonaviy sanoat texnologiyalari bo‘yicha dunyoning yetakchi markazlaridan biri. Bunday biznes platformalar esa TMK uchun yangi eksport bozorlariga chiqish, texnologik hamkorlikni kengaytirish hamda O‘zbekistonda kritik minerallar asosida yuqori qo‘shilgan qiymat yaratish imkoniyatlarini oshiradi.
