O‘zbekiston texnologik metallar kombinati (TMK) bosh ofisida Hindistonning RecycleKaro kompaniyasi rahbariyati bilan uchrashuv bo‘lib o‘tdi.
RecycleKaro urban mining (“shahar konchiligi”) yo‘nalishida faoliyat yurituvchi yetakchi kompaniyalardan biri bo‘lib, texnologik chiqindilarni qayta ishlash, ulardan foydali komponentlarni ajratib olishga ixtisoslashgan.
Uchrashuv davomida O‘zbekistonda texnologik chiqindilarni qayta ishlash sanoatini rivojlantirish istiqbollari, mavjud sanoat salohiyati hamda ikki tomonlama hamkorlikning ustuvor yo‘nalishlari muhokama qilindi.
Hindiston delegatsiyasi, shuningdek, TMK R&D Parkining ilmiy-tadqiqot va tajriba-sinov infratuzilmasi hamda innovatsion imkoniyatlari bilan yaqindan tanishdi.
Tomonlar texnologik chiqindilarni qayta ishlash, ulardan foydali komponentlarni qayta ajratib olish, shuningdek, ushbu yo‘nalishda qo‘shma ilmiy-tadqiqot va tajriba-konstruktorlik loyihalarini amalga oshirish istiqbollari yuzasidan fikr almashdilar.
Muzokaralar yakunida sohada o‘zaro manfaatli hamkorlikni davom ettirish, qo‘shma tashabbuslarni ishlab chiqish va istiqbolli loyihalarni birgalikda o‘rganish bo‘yicha kelishuvga erishildi.
