Bugun O‘zbekiston texnologik metallar kombinati bosh ofisida Toshkent axborot texnologiyalari universiteti magistrantlarining dissertatsiya ishlari himoyasi bo‘lib o‘tdi.
Tadbirda 7 nafar magistrant kompyuter injiniringi, raqamli texnologiyalar, Data Science, 3D-vizualizatsiya, virtual reallik, sun’iy intellekt hamda boshqa zamonaviy yo‘nalishlar bo‘yicha o‘z ilmiy loyihalarini taqdim etdilar.
TMK mutaxassislari real sektor vakillari sifatida magistrlik ishlarining amaliy ahamiyati, sanoatga tatbiq etish imkoniyatlari va kelgusida ishlab chiqarish jarayonlarida qo‘llash imkoniyatlarini baholadilar.
Ayniqsa, gidrodinamik modellashtirish yo‘nalishidagi loyiha alohida e’tiborga sazovor bo‘ldi. Mazkur yo‘nalish kelgusida gidrodinamik jarayonlarni modellashtirish bo‘yicha import dasturiy mahsulotlariga muqobil mahalliy yechimlarni ishlab chiqish uchun asos bo‘lishi mumkin. Shuningdek, 3D-modellashtirish asosida seysmik va vibratsion tebranishlarni baholash bo‘yicha taqdim etilgan loyiha ham amaliy jihatdan qiziqish uyg‘otdi.
Bugungi kunda TMK va TATU o‘rtasidagi hamkorlik doirasida quyidagi yo‘nalishlarda amaliy ishlar olib borilmoqda:
✔️ TMK Situatsion markazi uchun GIS-yechimlarni ishlab chiqish;
✔️ o‘zbek tilidagi nutqni transkribatsiya qiluvchi AI vositalarini joriy etish;
✔️ yig‘ilishlar yakuni bo‘yicha vazifalarni avtomatik shakllantirish;
✔️ Micromine Origin, GeoBank va Ignition/ASODU tizimlari bilan ishlash;
✔️ dual ta’limni rivojlantirish va sanoat uchun zamonaviy kadrlar tayyorlash.
Magistrlik dissertatsiyalari himoyasining TMKda tashkil etilishi ilm-fan, ta’lim va sanoat integratsiyasini mustahkamlash, yosh mutaxassislarning ilmiy ishlanmalarini real ishlab chiqarish ehtiyojlariga yo‘naltirish hamda kelajakdagi raqamli sanoat uchun professional kadrlar zaxirasini shakllantirish yo‘lidagi muhim qadam bo‘ldi.
